Tuesday, April 15, 2008

ကျိုင်းတုံဒေသထွက် အစားအစာများ 3 : နမ်းဖစ်ခို (ခမေ့်ဖိတ့်ခူဝ်;)


ဒီတစ်ခေါက်တော့ အိမ်လွမ်းသူများ အထူးသဖြင့် ရှမ်းပြည်က သယ်ရင်းများကို နှိပ်စက်ဖို့ အလှည့်ကျတဲ့ ကျိုင်းတုံဒေသထွက် အစားအသောက်ကတော့ “နမ့်ဖစ်ခို” ရှမ်းလိုဆို “ခမေ့်ဖိတ့်ခူဝ်;”လို့ အမည်ရတဲ့ ရှမ်းရိုးရာ အစားအစာ တစ်မျိုး ဖြစ်ပါတယ်...။

ဝက်ခေါက်အထွက်များ၊ အစားများတဲ့ ဒေသဖြစ်လို့ ၀က်ခေါက်နဲ့ ပါတ်သက်တဲ့ စားသောက်ဖွယ်ရာများ ပေါများနေတာ အဆန်း မဟုတ်ပါဘူး...။ ၀က်ခေါက်နဲ့ ပါတ်သက်လို့ အရင်ပို့စ်တွေမှာ ၀က်ခေါက် ဘယ်နှစ်မျိုး ရှိတယ်ဆိုတာကို ဒီမှာ နဲ့ ဒီမှာ တွေမှာ ရှင်းပြဖူးပါပြီ...။ အခု ဒီနမ့်ဖစ်ခိုမှာ ပါတဲ့ ၀က်ခေါက်အမျိုးအစားကတော့ သုံးထပ်သား (သစ်သား သုံးထပ်သားကို ပြောတာ မဟုတ်ကြောင်း သတိချပ်ပါလေ...။) ကို ကြော်ထားတဲ့ “င်္ခပ်;မူင်္ဂမ်း” အမျိုးအစား ဖြစ်ပါတယ်...။

အမေလုပ်တာ လွယ်လွယ်လေးရယ်...။ ပထမ ကြက်သွန်ဖြူကို အခွံပါရုံလေး သင်ပြီး မညက်တစ်ညက် ထောင်းရတယ်...။ နောက် ၀က်ခေါက်ကို အနေတော် အရွယ်လေးရအောင် ကပ်ကြေးနဲ့ ညှပ်ထားလိုက်...။ လက်တစ်ဆစ်လောက် အရွယ်ဆို ရပါပြီ...။ သင်ထားတဲ့ ကြက်သွန်ပြူတွေကို မတူးအောင် ကြော်ပါ...။ ငြုပ်သီးမှုန့်၊ ဆား၊ အချိုမှုန့် တို့ကို အနေတော် ထည့်ပါ...။ ပြီးရင်တော့ မီးဖိုပေါ်က ဒယ်အိုးကိုချ (ဂက်စ်မီးနဲ့ ချက်ရင်တော့ ဂက်စ်မီးကို ငြိမ်းလိုက်ပေါ့...။ ) ညှပ်ထားတဲ့ ၀က်ခေါက်ကို ဒယ်ထဲ ထည့်ပြီး ခုနင်က ကြော်ထားတဲ့ ကြက်သွန်ဖြူကြော်တွေနဲ့ ရောပြီး ဂလောက်ဂလောက်နဲ့ မွေလိုက်ပေါ့...။

ရပါပြီဗျား ... ရိုးရာ ဟင်းလေးတစ်ခွက်...။

အဲဒီဟင်းနဲ့ တွဲဖက်စားဖို့ အရည်သောက်လေး တစ်ပွဲက ပါတတ်ပါတယ်...။ အဲဒီ အရည်သောက်ဟင်းလေးကိုတော့ နောက်မှပဲ တင်တော့မယ်...။ ဒီနေ့ နည်းနည်း ပင်ပန်းလို့ ဒီလောက်နဲ့ပဲ တော်ပါရစေ...။

အိမ်လွမ်းသူများ နမ့်ဖစ်ခို ၀က်ခေါက်ဟင်းကို ကြိုက်သလောက် အိမ်သယ်သွားနိုင်ပါကြောင်း စေတနာ ဗလပွနဲ့ အလှူကြီး လုပ်လိုက်ပါတယ်...။


No comments:

Post a Comment